لأول مرة صفحة “أسف ياريس” تُهاجم السيسي.. شاهد التدوينة والتفاصيل
مبارك وأدمن اسف ياريس

هاجم أدمن صفحة “أنا آسف ياريس” الرئيس عبد الفتاح السيسي، ولأول مرة منذ تدشين الصفحة على الفيس بوك لمناصرة الرئيس الأسبق “حسني مبارك”، بحيث وجه “كريم حسين” أدمن الصفحة العديد من الانتقادات لنظام الحكم الحالي، من خلال مقارنة فترة حكم الرئيس الأسبق “حسني مبارك”، بفترة حكم السيسي.

وجاءت هذه الانتقادات رداً على تصريحات الرئيس “عبد الفتاح السيسي” أمس خلال لقائه بالمثقفين حين قال: “مؤسسات الدولة خربانة ومبارك جاب البلد الأرض”.

ومن خلال تدوينة مطولة عبر صفحة “أنا آسف ياريس”  عبر موقع التواصل الاجتماعي “فيس بوك” قال “كريم”:

” خد ياريس هقولك مين اللي جاب البلد الأرض! اللي جاب البلد على الأرض ياريس هو اللي قال في 2010 أن ستظل راية مصر خفاقة تحت قيادة ابنها البار حسني مبارك وطلع بعد ما مبارك مشي وقال أنا قولت من 2005 أنهم مش هيمشوا الا لما يخربوها …عبط إحنا يا عصام .

اللي جاب البلد على الأرض ياريس هو اللي سمح وهو في المخابرات الحربية إن حماس تخترق الحدود بالعربيات الدفع الرباعي وبالأسلحة التقيلة و تقتحم السجون وتضربها بالمدافع وتهرب رجالتها وتدخل وتخرج بل وتخطف ظباط شرطة ومجندين من غير ما حد يعترضها .. وأنا عامله نفسى نايمة !

وتابع قائلاً:

اللي جاب البلد على الأرض ياريس هو اللي حاكم وحاسب مبارك على قتل المتظاهرين مع إنه كان منزل حضراتكم من يوم 28 يناير وهو اللي عمل نفسه مش شايف طنطاوي ولا باقى أعضاء المجلس ولا حاسبهم على مجزرة محمد محمود و مجزرة ماسبيرو ومجزرة أستاد بورسعيد ..إعمل نفسك ميت!

اللى جاب البلد على الأرض ياريس هو اللي عمل أول حزب سياسى رسمى للأخوان المسلمين وجاب منهم رئيس وهو عارف إنه هربان من سجن وادي النطرون ..وماله مش عيب يا خويا! اللي جاب البلد على الأرض ياريس هو اللي كان بيضرب التحية العسكرية لمحمد مرسي وكان بيقسم فى فيديو شهير ليه إنه كان بيخدمهم لأخر لحظة ..أسرة واحدة من بعضيهم !

وأضاف:

اللي جاب البلد على الأرض ياريس هو اللى ضحك على الناس وأخد منهم 86 مليار جنية فى تفريعة عمال تخسر وبيسدد فوايدها من الأسعار اللى رفعها على الناس من النحية التانية ..قطر داير وجمعية مبتقفش !اللى جاب البلد على الأرض ياريس هو اللى تاجر بفقر المواطن الغلبان فى القنوات والخطب وقام رافع عليه الأسعار وشايل من عليه الدعم المية والكهرباء والسلع ..هتكلوا مصر يعنى !

 

اللى جاب البلد على الأرض ياريس هو اللى طلع وقال الناس ان المية بتتباع بسعر قليل ومش هنقدر نبيعها بالسعر دة ولازم نرفعه ..أنا مش قادر اديك ! اللى جاب البلد على الأرض ياريس هو اللى ضيع 36 مليار دولار إحتياطى نقدى و 9 مليار دولار وديعة حرب الكويت .إراك توزع من أموال أمك !

 

اللى جاب البلد على الأرض هو اللى طلع وقال لوزير الأسكان أنا اللى بقولك أرفع أسعار الشقق ..الجنة يدخلها الفقراء ! اللي جاب البلد علي الأرض ياريس هو اللي راح اعترف رسميا بسد النهضة ووافق علي إتفاقية إنشاءه ..اشرب علشان تنسي !

 

اللى جاب البلد على الأرض ياريس هو اللى الدولار فى عهده بقى ب10 جنية لأول مرة فى تاريخ مصر ..!اللى جاب البلد على الأرض ياريس هو اللى السياحة بقت صفر فى عهده ..إنها رجس من عمل الشيطان !

 

اللى جاب البلد على الأرض ياريس هو اللى جنوده عمال تتقتل وتتدبح وتستشهد كل يوم وتتصور فيديو وهو يروح يقولهم يارتنى كنت أنا ..قلب الأم بقى ! اللى جاب البلد على الأرض ياريس هو اللى بيتعامل مع رجال الأعمال بسياسة شخلل علشان تعدى اللى عايز ميدخلش السجن يشخلل واللى عايز يرجع يدفن فى البلد يشخلل واللى عايز يقفل قضية يشخلل !

 

اللى جاب البلد على الأرض هو اللى استعان برجالة الراجل اللى جابها على الأرض فى المناصب الوزارية والحكومية ..مبيعرفش يوجفها ! اللى جاب البلد على الأرض ياريس هو عمال يستلف قروض من البنك الدولى ضعف عدد القروض أللى استلفتها مصر فى تاريخها .ليك وهتاخد وعليك وهتدفع !

 

اللى جاب البلد على الأرض ياريس هو اللى ضحك على الناس المرضى الغلابة بجهاز عبد العاطى بتاع الكفته وطلع فى الأخر فنكوش ! اللي جاب البلد علي الأرض ياريس هو اللي عدد الجنازات في عهده بقت اكتر من عدد الانجازات بتاعته.! اللى جاب البلد على الأرض ياريس هو اللى طلع يشحت على دولة 7000 سنة برسالة بجنية ..صبح صبح ياعم الحج !

 

اللى جاب البلد على الأرض ياريس : هو اللى مبيبقبلش لأى شخصية ليها حضور فى الشارع أوشعبية إنها تبقى موجودة فى مصر على طول يبقى مكانها يأما فى السجن ياما فى التربة يا أما فى الإمارات ..أسمعوه هو بس ! اللى جاب البلد على الأرض هو اللى ممكن يلفقلى قضية ويحبسنى علشان بوست تافة زى اللى انا كاتبه دة ..مجنون ويعملها !

مهاجمة صفحة أسف ياريس للسيسي

تابعنا على المواقع الاجتماعية ليصلك الجديد أولا بأول

التعليقات

  1. لقد انشغل الجميع بالمطالبة بمحاكمة حسنى مبارك على قصر رشوة واشياء عبيطة وظهر اننا لانمتلك اي رؤيا وكان من المفترض محاكمة استثنائية لمبارك على انهيار جميع قطاعات الدولة بلا استثناء حتى وصلنا لما نحن فيه اليوم من خراب ودمار .

أضف تعليقاً

لن يتم نشر عنوان بريدك الإلكتروني.