بعض الاسر المصرية بتحب انها تعمل طبق شرقى مميز فى سفرتها يحبه اطفالهم وكمان يكون مغذى ومليان بالقيم الغذائية بعيدا عن الوجبات الجاهزة وفى نفس الوقت غير مكلف .

بنقترح عليكم اليوم عمل القرنبيط المقلى المقرمش اولا طعمه جميل جدا وثانيا مقرمش فهيحبه اطفالك وثالثا مكوناته فيها قيم غذائية مفيدة لصحة اولادك .

هنتعلم طريقة التحضير بشكل هتحبيه جدا والمقادير متوفرة فى كل منزل , على فكرة انا نفذت الطبق وبجد طعمه جميل جدا وهتكرريه على طول , تعالوا بينا نشوف المقادير والخطوات وبالهنا والشفا .

المقادير :-

1 قرنبيط

1 كوب دقيق

3 بيضات كبار

شبت مفروم + كزبرة مفرومة + بقدنوس مفروم

ملح + فلفل + بهارات

3 اكواب زيت للقلية

طريقة التحضير :-

اولا نقطع ازهار القرنبيط ونسلقها فى ماء ساخن مضاف اليه القليل من الملح , ثم نقوم بتجهيز الخلطة فى وعاء مكونة من البيض والدقيق والبقدنوس والكزبرة والشبت والملح والفلفل والبهارات ونضربها جيدا , ثم نقوم بتسخين الزيت فى طاسة القلية ونغمس زهرة القرنبيط فى الخلطة ونضعها فى الزيت الساخن ( نراعى ان لما الزيت يسخن كويس ونضيف زهرة القرنبيط نهدى النار علشان تاخذ اللون الذهبى بدون ما تحرق وفى نفس الوقت تطلع مقرمشة ) ونكرر هذه الخطوة الى ان تنتهى الكمية , ثم نحضر طبق التقديم ونضع فيه القليل من البقدنوس ونضع فوقيها القرنبيط المقلى , ويتم تقديمه وهو ساخن .